დენი ეინჯი ნაციონალურ საკალათბურთო ასოციაციის წლის საუკეთესო მენეჯერად აღიარეს. როგორც AP იუწყება, “ბოსტონის” გენერალურმა მენეჯერმა, გასულ წელს “სელტიკსში” ერთბაშად 2 უმაღლესი კლასის ვარსკვლავის გადაყვანა მოახერხა – რეი ალენის და კევინ გარნეტის. ეინჯმა ჯერ ალენი შეიძინა, შემდეგ კი ეს ფაქტი გამოიყენა გარნეტთან მოლაპარაკებისას, რომლის ოცნებაც NBA–ს მოგება იყო და “მინესოტას” ფორვარდიც საკუთარ გუნდში გადაიყვანა. გარნეტის გაცვლა ლიგის ისტორიაში უპრეცედენტო იყო, რადგანაც “ტიმბერვულზმა” საკუთარი ლიდერის სანაცვლოდ 7 კალათბურთელი მიიღო, მათ შორის ისინიც, რომლებსაც მომავალ დრაფტზე აარჩევს. შედეგად, “ბოსტონში” ალენის, გარნეტისა და პოლ პირსის სახით თავი ვარსკვლავურმა ტრიომ მოიყარა და მიმდინარე სეზონში სენსაცია მოახდინა – 2006/2007 წლების ყველაზე ცუდმა გუნდმა, მიმდინარე წლის რეგულარულ ჩემპიონატში, 82 შეხვედრიდან 66-ში გამარჯვება მოიპოვა და სატურნირო ცხრილის სათავეში მოექცა. NBA-ს 47 მენეჯერიდან, ეინჯს ხმა 18-მა მისცა. მე-2 ადგილზე 14 ხმით “ლეიკერსის” მენეჯერი მიჩ კუპჩაკი გავიდა, მე-3 ადგილი კი, 12 ხმით “ნიუ ორლეანის” მენეჯერ ჯეფ ბაუერს ერგო.