๑۩۞۩๑٠•●BASKETBALL●•٠๑۩۞۩๑

ტრევიზოს კემპზე შერმადინმა 10-ქულიანი მატჩი ჩაატარა

ado — Thu, 12 Jun 2008 19:32:36 GMT

იტალიის ქალაქ ტრევიზოში სტარტი აიღო ტრადიციულმა საზაფხული კემპმა, რომელშიც მონაწილეობას საქართველოს საკალათბურთო ნაკრების სამი წევრი – მანუჩარ მარკოიშვილი, გიორგი ცინცაძე და გიორგი შერმადინი იღებს.
საქართველოს კალათბურთის ფედერაციის ვებ-გვერდუს ცნობით, კემპის პირველ დღეს შერმანის გარჯას სკაუტინგის საერთაშორისო კომიტეტის დირექტორი ლუის ფერნანდესი და ამავე ორგანიზაციის პრეზიდენტი ჯონათან ჯივონი გამოეხმაურნენ.
“შერმადინი აღნიშნული კემპის ერთ-ერთი ყველაზე საინტერესო მოთამაშეა, რომელიც სამწამიანში საკმაოდ დამაჯერებლად გამოიყურება და ერთხელაც ამტკიცებს, რომ იგი არა მხოლოდ საქართველოს ჩემპიონატის სტატისტიკური ლიდერია.
ქართველს კარგი მოძრაობები და ათლეტურობა აქვს, საკმაოდ აგრესიულია და მიუხედავად იმისა, რომ ფიზიკურად ჯერ კიდევ ბევრი უნდა მოუმატოს, მას კალათბურთში ბევრი ესმის.
მარჯვენა ხელით იგი ბურთს საკმაოდ კარგად ატარებს და ისვრის, ნახევარბრუნში სროლის შესრულებისას კი დამაჯერებლად გამოიყურება.
მოედანზე სწრაფი გადაადგილების ხარჯზე შერმადინი ოპონენტებს არაფერს უთმობს. შეიძლება, იგი არ იყოს ყველაზე ნიჭიერი მოთამაშე, მაგრამ მას ნამდვილად აქვს პოტენციალი”.
შერმადინს მეორე დღეს თურქი გიგანტების – ომერ აშიქისა და სემიჰ ერდენის წინააღმდეგ სპარინგი მოუწია. შერკინება ძირითადად 2/2-ზე და 3/3-ზე თამაშით შემოიფარგლა და მთელი ყურადღება თურქებზე იყო გადატანილი.
შერმადინმა მომენტებში კარგად იასპარეზა, თუმცა გაცილებით ძლიერი თურქების წინააღმდეგ ეპიზოდებში უპირატესობას თმობდა.
კემპის მეორე დღეს წარსულში ლეგენდარული მოთამაშე “მილუოკი ბაქსის” ლიდერი ჯეკ სიკმა უძღვებოდა, რომელსაც “ტორონტოს” სამწვრთნელო შტაბის წევრი ჯეი ტრაიანო ეხმარებოდა.
შერმადინმა მონაწილეობა მიიღო “ლურჯებისა” და “წითლების” შეხვედრაშიც, რომელიც “წითლებმა” 67:65 მოიგეს.
საქართველოს ნაკრების წევრმა პირველივე წუთებში სამი ჩატენვით სწრაფად 6 ქულა დააგროვა. საბოლოოდ, მან თამაშიდან 6-დან 4 ტყორცნა გამოიყენა და თამაში 10 ქულით დაასრულა.
პირველი წარმატებული მატჩი ჩაატარა მანუჩარ მარკოიშვილმაც. მისი და ვიაჩესლავ კრავცოვის კარგი თამაშის წყალობით, მარკოიშვილის გუნდმა პირველი გამარჯვება იზეიმა, მანუჩარმა კი საკმაოდ კარგად ითამაშა და სპეციალისტების მოწონებაც დაიმსახურა.
უკვე გამოქვეყნებულია დრაფტის წლევანდელი სავარაუდო გამსვლელების სია, რომელშიც 1986 წელს დაბადებულთა შორის გიორგი ცინცაძე და მანუჩარ მარკოიშვილიც ფიგურირებენ.

18-წლამდე კალათბურთელთა ნაკრები ევროპის ჩემპიონატისთვის მზადებას შეუდგა

KICKER — Sun, 08 Jun 2008 12:47:24 GMT

საქართველოს 18-წლამდე იუნიორ კალათბურთელთა ნაკრები დღეს, 5 ივნისს, ვაკეში მდებარე კალათბურთის აკადემიის დარბაზში, ევროპის საკვალიფიკაციო ტურნირისთვის მზადებას შეუდგა, რომელსაც 25 ივლისიდან, უნგრეთის ქალაქი სომბათჰეი უმასპინძლებს.
საქართველოს იუნიორ კალათბურთელთა ნაკრების მთავარმა მწვრთნელმა მიხეილ კობეშავიძემ, შეკრებაზე 17 კალათბურთელი გამოიძახა, რომელთაგანაც, 12 საუკეთესოს შეარჩევს: ვაჟა მეტრეველი (“მონტეპასკი”, იტალია), თორნიკე შენგელია (“ვალენსია”, ესპანეთი), გიორგი ჯგერენაია (“პეისაკოლას კოლეჯი”, აშშ), კონსტანტინე ტომარაძე (“ბარსელონა”, ესპანეთი), გიორგი შარაბიძე, ბექა ჩიკვილაძე (ორივე “ტენერიფი”, ესპანეთი), აკაკი დვალიშვილი (”ენერჯი ინვესტი”), გიორგი ნანიტაშვილი, გუგა სოხაძე, ტატო თავართქილაძე, გიორგი მაისურაძე, დავით გიორგობიანი (ყველა “დინამო”), ტატო ჩაჩიბაია (“საბონისის აკადემია”, ლიტვა), გიორგი ბარბაქაძე (უკლუბო), გიორგი კვენეტაძე (“მართვე”), კაკი ლომოური (“თბილისი”) და ირაკლი ძიძიგური (ვითა”).

“პანათინაიკოსმა” “ოლიმპიაკოსი” გაამწარა

KICKER — Sun, 08 Jun 2008 12:44:47 GMT

საბერძნეთის 2007-08 წლების სეზონის ოქროს მედლების მფლობელი ევროპული კალათბურთის გრანდი “პანათინაიკოსი” გახდა.
ათენელებმა გადამწყვეტ მატჩში მარადიულ მეტოქე პირეოსის “ოლიმპიაკოსს” 90:76 სძლიეს და ფინალურ სერიაში 3:2 იმარჯვეს.

“ფენერბაჰჩემ” ოქროს მედლები მოიპოვა

KICKER — Sun, 08 Jun 2008 12:43:45 GMT

თურქეთის საკალათბურთო ჩემპიონატის გამარჯვებული სტამბულის “ფენერბაჰჩე” გახდა.
ფინალური სერიის მეხუთე მატჩში სტამბულელებმა “ტუკრ ტელეკომს” 90:79 სძლიეს და საერთო ჯამში, მეტოქე 4:1 დაამარცხეს.
დასკვნით შეხვედრაში “ფენერბაჰჩეს” რიგებში საუკეთესო ონანმა 20 ქულა მიითვალა, სტუმართა ლიდერმა ლენგმა კი 19 ქულას 9 მოხსნა წაამატა.

04.06 მნიშვნელოვანი ფაქტები

KICKER — Sun, 08 Jun 2008 12:41:55 GMT

1938. საფრანგეთის მსოფლიოს მე-3 ჩემპიონატი ფეხბურთში. შვეიცარია - გერმანია 1:1 (დამატებითი დრო).
1950. ინგლისის საფეხბურთო ასოციაციამ პროფესიულ ლიგებში მოასპარეზე კლუბების რაოდენობა 92-დე გაზარდა.
1971. თბილისის “დინამომ” თურქეთის ოლიმპიურ ნაკრებთან 0:0 ითამაშა. შეხვედრა ირანის დედაქალაქ თეირანში ჩატარდა.
1991. დაარსდა საქართველოს კალათბურთის ფედერაცია. მისი პირველი პრეზიდენტი ალექსანდრე ჩხეიძე იყო. შემდგომში ფედერაციას ავთანდილ საყვარელიძე და გოგი ქათამაძე ხელმძღვანელობდნენ. ამჟამად, ფედერაციის პრეზიდენტი ბესიკ ლიპარტელიანია. საქართველოს კალათბურთის ფედერაცია 1992 წლის 10 ივლისიდან გაწევრიანდა კალათბურთის საერთაშორისო ფედერაციასა (FIBA) და ევროპის კალათბურთის კონფედერაციაში.
2000. საქართველოს ფეხბურთელთა ეროვნულმა ნაკრებმა განჯაში, აზერბაიჯანთან 0:0 ითამაშა.
2002. მსოფლიოს მე-17 ჩემპიონატი ფეხბურთში (კორეა-იაპონია). ჩ ჯგუფი. ჩინეთი-კოსტა რიკა 0:2. D ჯგუფი. სამხრეთ კორეა-პოლონეთი 2:0.
2005. მსოფლიოს ჩემპიონატის შესარჩევ მატჩში, საქართველოს ეროვნული ნაკრები, ტირანაში, ალბანეთის გუნდთან 2:3 დამარცხდა. ქართველთაგან გოლები ლადო ბურდულმა და ლევან კობიაშვილმა გაიტანეს.
2006. საქართველოს მორაგბეთა ეროვნული გუნდი ბრიტანელ “ბარბაროსებთან” დამარცხდა (19:28)

ამ დღეს დაიბადნენ
1902. რიჩარდ ალენი. ინდოეთის ბალახის ჰოკეისტთა ნაკრების მოთამაშე. 1928 წლის ოლიმპიური ჩემპიონი.
1945. ივან “აირონმენ” სტიუარტი. ველოსპორტში მსოფლიოს 1983, 1984 და 1990 წლების ჩემპიონი.
1948. იურგენ შპარვასერი. გდრ-ის ფეხბურთელთა ნაკრების ფორვარდი. 1972 წლის ოლიმპიური თამაშების პრიზიორი.
1952. მიხაილ კუზნეცოვი. აკადემიურ ნიჩბოსნობაში 1976 წლის ოლიმპიური თამაშების ჩემპიონი.
1973. იგორ ლავროვი. ხელბურთში 2000 წლის ოლიმპიური თამაშების ჩემპიონი. მსოფლიოს ჩემპიონი.
1974. კეტი სმიტი. ამერიკელი კალათბურთელი. ოლიმპიური თამაშების ჩემპიონი.
1976. აქვსენტი გიორგაძე. საქართველოს მორაგბეთა ეროვნული ნაკრების, იტალიური “როვიგოსა” და ფრანგული “კასტრის” მოთამაშე.
1976. თეა დონღუზაშვილი. რუსეთის სახელით მოასპარეზე ქართველი ძიუდოისტი. ოლიმპიური თამაშების, მსოფლიოს უნივერსიადის, მსოფლიოსა და ევროპის ჩემპიონატების მონაწილე.
1980. ლაზაროს პაპადოპულოსი. საბერძნეთის კალათბურთელთა ეროვნული ნაკრების მეფარე (211 სმ). 2005 წლის ევროპის ჩემპიონი.
1982. მარია ოლარუ. რუმინელი ტანმოვარჯიშე. 2000 წლის ოლიმპიადის ორგზის ჩემპიონი.
1982. ელენა ისინბაევა. სიმაღლეზე ჭოკით ხტომაში ოლიმპიური თამაშებისა და მსოფლიოს ჩემპიონი.

იგორ კოკოშკოვმა ასისტენტი დაასახელა

KICKER — Sun, 08 Jun 2008 12:39:46 GMT

საქართველოს საკალათბურთო ნაკრების მთავარმა მწვრთნელმა იგორ კოკოშკოვმა თავის ასისტენტად ჯეისონ სტოდტი დაასახელა, რომელიც ამ მოვალეობებს დავით უსტიაშვილთან ერთად შეასრულებს.

ჯეისონ სტოდტი
დაიბადა: 04.11.76
სამწვრთნელო კარიერა
საკლუბო დონე
2001-02, ორლანდო მეჯიქი (NBA), საერთაშორისო საკალათბურთო ოპერაციები.
2002-03, ორლანდო მეჯიქი (NBA), ვიდეო სკაუტი.
2003-04, ორლანდო მეჯიქი (NBA), სკაუტის ასისტენტი.
2004-05, აიდაჰო სტემპიდი (CBA), მთავარი მწვრთნელის ასისტენტი/ინდივიდუალური მწვრთნელი.
2005 – კლივლენდ კავალიერსი (NBA), სკაუტის ასისტენტი.
2005-07 – მილუოკი ბაქსი (NBA), ვიდეო კოორდინატორი.

სანაკრებო დონე
2007 – საქართველოს ნაკრები (ასისტენტი, მთავარი მწვრთნელი – კენ შილდსი).

კოლეჯის დონე
1995-2000, ტეხასის ტექ უნივერსიტეტი, ასისტენტი.
1997-2000, ტეხასის ტექ უნივერსიტეტი, მთავარი მენეჯერი.

მიღწევები
NBA-ს ფლეი ოფი (2002, 2003, 2006).
1995-96, სამხრეთ-დასავლეთის კონფერენციის რეგულარულის ჩემპიონი.
1995-96, SWC-ს ფლეი ოფის ჩემპიონი.
1995-96, NCAA-ს 16 საუკეთესო გუნდში მოხვედრა.
1995-96, საუკეთესო შედეგი სკოლის ისტორიაში (30:2).

ნელსონს დარჩენისკენ ბრაუნის მაგალითმა უბიძგა

KICKER — Sun, 08 Jun 2008 12:38:32 GMT

დონ ნელსონმა ეროვნული საკალათბურთო ასოციაციის (NBA) კლუბ “გოლდენ სტეიტ უორიორსთან” კონტრაქტი ერთი წლით გააგრძელა.
ნელსონის კომენტარი San Francisco Chronicle-მა გამოაქვეყნა.
“შანსი მქონდა კალათბურთისგან დამესვენა, თუმცა, რადგანაც კლუბმა თანამშრომლობის გაგრძელება შემომთავაზა, მეც სიამოვნებით დავთანხმდი. ლარი ბრაუნი ჩემზე გაცილებით ხნიერია, თუმცა, კალათბურთში დარჩენას კიდევ ოთხი წელი აპირებს, ასე რომ, მთლად ბებერი არც მე უნდა ვიყო”.

“ჰოუქსი” სმიტსა და ჩილდრესს ვერ ელევა

KICKER — Sun, 08 Jun 2008 12:36:26 GMT

ეროვნული საკალათბურთო ასოციაციის (NBA) კლუბი “ატლანტა ჰოუქსი” ჯოშ სმიტთანა და ჯოშ ჩილდრესთან კონტრაქტების გაგრძელებას გეგმავს.
აღნიშნულის შესახებ ქართველი ზაზა ფაჩულიას გუნდის გენერალურმა მენეჯერმა რიკ სანდიმ “ჰოუქსის” ოფიციალურ ვებ-გვერდს განუცხადა.
“სმიტი და ჩილდრესი თამაშს ყოველ წელს აუმჯობესებენ, ამდენად, სამომავლოდ მათ დიდ იმედებს ვუკავშირებთ. დარწმუნებული ვარ, მათთან ერთად ფლეიოფში მომავალ სეზონშიც გავაღწევთ”.
გასულ სეზონში სმიტის საშუალო მონაგარი 17.2 ქულა, 8.2 მოხსნა და 3.4 პასი გახლდათ, ჩილდრესი კი 11.8 ქულას, 4.9 მოხსნასა და 1.5 პასს აგროვებდა.

მურნინგი მომავალ სეზონში თამაშს აპირებს

KICKER — Sun, 08 Jun 2008 12:35:13 GMT

ეროვნული საკალათბურთო ასოციაციის (NBA) ვეტერანი მოთამაშე ალონზო მურნინგი, რომელსაც გასული სეზონის უმეტესი ნაწილი ტრავმების გამო გაუცდა, მომავალ ჩემპიონატში ასპარეზობას აპირებს.
აღნიშნულის შესახებ მურნინგმა South Florida Sun-Sentinel-ს განუცხადა.
“ეს გადაწყვეტილება ძალიან მტკიცეა. თუკი, ჯანმრთელობამ საშუალება მომცა, პარკეტზე აუცილებლად გავალ და გუნდისთვის მაქსიმუმს გავიღებ”.

ერნანდესი ესპანეთის ნაკრებიდან დაითხოვეს

KICKER — Sun, 08 Jun 2008 12:33:21 GMT

ესპანეთის კალათბურთის ფედერაციამ ეროვნული გუნდის მთავარი მწვრთნელი პეპუ ერნანდესი თანამდებობიდან გაათავისუფლა.
EFE-ს ცნობით, ეს გადაწყვეტილება ერნანდესისა და ფედერაციის პრეზიდენტ ხოსე ლუის საეზის შეხვედრის შემდეგ იქნა მიღებული.
ერთი თვის წინ ერნანანდესმა განაცხადა, რომ თანამდებობიდან წასვლას პეკინის ოლიმპიადის შემდეგ აპირებდა, თუმცა, როგორც გაირკვა, ფედერაციაში სხვაგვარად ფიქრობდნენ.
ერნანდესის ხელში ესპანეთის ნაკრებმა 2006 წლის მსოფლიოს ჩემპიონატი მოიგო, ევროპის 2007 წლის პირველობაზე კი ვერცხლის მედლები მოიპოვა.