 “ატლანტა ჰოუქსმა” “ფილადელფია სიქსერზთან” ერთმანეთის მიყოლებით ორი მატჩი გამართა, ჯერ სტუმრად, შემდეგ – შინ. ჯორჯიელებმა საშინაო შეხვედრა 104:109 დათმეს, ხოლო გასვლითი – 92:85 მოიგეს.
“ატლანტამ” ფილადელფიელები ფარქვეშ ორივე შემთხვევაში დაჩაგრა, შინ მოხსნებში 39:29 აჯობა, ხოლო სტუმრად – 42:33. თუმცა, პირველ მატჩში წაგების მიზეზი “სიქსერზის” ფორვარდის ანდრეს იგუოდალას დამაჯერებელი თამაში იყო. მან 30 ქულა და 10 შედეგიანი პასი მიითვალა.
“ატლანტას” მხრიდან ჯო ჯონსონი გამოირჩა, რომლის ანგარიშზე 32 ქულაა. ზაზა ფაჩულიამ წაგებულ შეხვედრაში 17 წუთი ითამაშა, 5–დან 3 ორქულიანი გამოიყენა და მატჩი 6 ქულით, 5 მოხსნით, 2 შეცდომითა და 1 ფოლით დაასრულა.
მოგებულ გასვლით შეხვედრაში ზაზამ ერთით ნაკლები, 16 წუთი ითამაშა და შეტევითი მონაგარი იგივე ჰქონდა: 6 ქულა (აქაც 5–დან 3 ორქულიანი), 4 მოხსნა, 2–2 პას–ჩაჭრა და 1 შეცდომა.
საშინაო მატჩში 30 ქულას არც ერთი ატლანტელი არ ასცდენია, სასტარტო ხუთეულის კალათბურთელიდან ბიბიმ და ჰორფორდმა 10–10 ქულა, სმირმა და უილიამსმა – 18–18, ხოლო ჯო ჯონსონმა 22 ქულა მოაგროვეს. სათადარიგოებიდან 10 ქულას ვერავინ უწია. სწორედ ქულათა ასეთმა გადანაწილებამ ათქმევინა “ჰოქსის” თავკაც მაიკ ვუდსონს, როგორც იქნა გუნდურად ავთამაშდითო: “დღევანდელმა მატჩმა გვიჩვენა, რომ “ატლანტაში” ფუნქციები თანაბრადაა გადანაწილებული და გუნდურ თამაშს ვუჩვენებთ. სწორედ ამიტომ ვუახლოვდებით პლეიოფს. 1999 წლის შემდეგ რეგულარული ეტაპი არ დაგვიძლევია. შეიძლება წელს პლეი ოფში მოხვედრა შემადგენლობის ახალგაზრდულობის გამო ვინმეს წარმოუდგენლად ეჩვენება, მაგრამ გამოუცდელმა კალათბურთელებმა დაამტკიცეს, რომ თამაში შეუძლიათ. ისინი დღითი–დღე უმჯობესდებიან. მათით ვამაყობ.”
ჩვენი მხრივ დავძენთ, რომ ჯონსონისა და ბიბის გარდა, პლეი ოფში თამაშის გამოცდილება არც ერთ არა ატლანტელს აქვს.
ბოლოს აღმოსავლეთის კონფერენციის ცხრილსაც შევავლოთ თვალი. “ჰოქსის” ანგარიშზე 36 მოგება და 41 წაგებაა, ან შედეგით იგი საპლეიოფო ზონაში მერვე ადგილზეა. მეცხრეა “ინდიანა”, რომელსაც 32 მოგება და 44 წაგება უწერია. რეგულარული ჩემპიონატის დასრულებამდე ზაზას გუნდს 5 მატჩი აქვს დარჩენილი. მათ შორის უახლოესი სწორედ “ინდიანა პეისერსთან”, სტუმრად, 8 აპრილს.
წყარო: გაზეთი “ლელო”
|
