ხუთშაბათი, 2024-11-21, 5:25 PM
მოგესალმებით Guest

WE LOVE THIS GAME

Main » » ნიკა ცქიტიშვილი: პასუხისმგებლობა ყველამ უნდა გადავინაწილოთ

ნიკა ცქიტიშვილი: პასუხისმგებლობა ყველამ უნდა გადავინაწილოთ	12:56 PM
საქართველოს ეროვნული ნაკრების კალათბურთელ ნიკოლოზ ცქიტიშვილს მშვენიერი სეზონი ჰქონდა იტალიურ “ტერამოში”, რომელშიც გუნდის ერთ-ერთი ლიდერი იყო. სამწუხაროდ, “ტერამო” პლეი-ოფში ვერ გავიდა და ნიკას ნაადრევად მოუხდა სეზონის დამთავრება. ქართველ ფორვარდს გუშინ, იტალიაში შევეხმიანეთ და სხვადასხვა საინტერესო საკითხებზე გავესაუბრეთ. - სამწუხაროა, რომ პლეი-ოფში ვერ გავედით. არადა, ისეთი შემადგენლობა გვყავდა, რომ საუკეთესო რვა გუნდს შორის მოხვედრა არ უნდა გაგვჭირვებოდა. ყველაფერი “ტერამოს” თავკაც მასიმო ბიანკის ბრალია. კლუბის ხელმძღვანელობამ დიდი შეცდომა დაუშვა, როდესაც მას მთავარი მწვრთნელის პოსტი ანდო - იქამდე მეორე მწვრთნელად მუშაობდა და სეზონის დასაწყისში გაპირველდა, რისთვისაც მზად არ აღმოჩნდა. ელემენტარულად, ჩვენი გუნდის უბრალო გულშემატკივრებიც კი ადვილად ხვდებოდნენ, რომ ბიანკი არასწორად უძღვებოდა ხოლმე თამაშს და მატჩში თითოეული შეცვლისა თუ წუთშესვენების აღებისას უსტვენდნენ. არადა, სეზონი კარგად დაიწყეთ. რა მოხდა მერე? - იმიტომ დავიწყეთ კარგად, რომ თავიდან, კალათბურთელები ინდივიდუალური ოსტატობის ხარჯზე გავდიოდით ფონს. მერე კი, მეტოქეებმა გაგვშიფრეს და სწორედ, აქ გვჭირდებოდა კარგი მწვრთნელის ხელი, რომელიც ტაქტიკურ მონახაზებს შეცვლიდა. არ მინდა ისე გამომივიდეს, რომ მხოლოდ ბიანკიზე გადავტეხო ჯოხი, მაგრამ სეზონის ჩაგდებაში მთავარი დამნაშავე სწორედ ის არის. უკეთესი მწვრთნელის ხელში, მინიმუმ, ხუთი მატჩით მეტს მოვიგებდით, პლეი-ოფამდე კი მხოლოდ 2 გამარჯვება დაგვაკლდა. სამწუხაროდ, კლუბის ხელმძღვანელობა სეზონის ბოლოსღა მიხვდა შეცდომას და ახალ მწვრთნელს ეძებენ. იმედია, მასიმოზე გაცილებით უკეთეს სპეციალისტს მონახავენ. როგორც გავიგეთ, ამას წინათ ბიანკისთან კონფლიქტი შეგემთხვა... - იყო პატარა პრობლემა, მაგრამ სერიოზულ გართულებას ადგილი არ ჰქონია. ისევე ვიყავი ბიანკით უკმაყოფილო, როგორც ჩემი თანაგუნდელები თუ გულშემატკივრები. უბრალოდ, პირდაპირ ლაპარაკი მიყვარს და ჩემი გულისტკივილი ხმამაღლა დავაფიქსირე - ეს იყო და ეს. საკუთარი თამაშით კმაყოფილი ხარ? - მეტ-ნაკლებად კმაყოფილი ვარ. იყო მატჩები, რომლებშიც კარგად გამოვიყურებოდი და მქონდა მცირე ჩავარდნებიც. მთლიანობაში, სეზონი ჩემთვის უფრო პოზიტიური იყო, ვიდრე - ნეგატიური. თავიდან, წონაში მომატებული მქონდა და ხუთი მატჩი ცენტრფორვარდის პოზიციაზე მათამაშეს, სადაც ნორმალურად გამოვიყურებოდი. მერე კი წონაში დავიკელი, ოპტიმალურ ფორმაში შევედი და მძიმე ფორვარდის ადგილს დავუბრუნდი, რის შემდეგაც უკვე ხშირად პერიმეტრზეც ამოვდიოდი, რომ სამქულიანები მესროლა. იყო მომენტები, როდესაც “ტერამოს” გამარჯვებაში სწორედ, შორეული ტყორცნებით დავეხმარე. წლევანდელ სეზონში განსაკუთრებით რომელი მატჩი დაგამახსოვრდა? - “ბიელასთან” მოგებული შეხვედრა. ამ მატჩის პირველი ნახევარი, ფაქტობრივად, ჩავაგდე. დასკვნით ორ მეოთხედში კი, 25 ქულა და 6 მოხსნა მოვაგროვე. რაც მთავარია, გადამწყვეტი სამქულიანი ჩავაგდე და “ტერამოს” უმძიმესი მატჩი მოვაგებინე. ისე, ჩავარდნები ნებისმიერი სპორტსმენის თანამდევი რამაა. მთავარია, ფსიქოლოგიურად არ გატყდე და კრიზისი მაქსიმალურად მკლე დროში დაძლიო. იტალიურ სპორტულ გამოცემა “ტუტოსპორტში” დაიწერა, რომ სამი წამყვანი იტალიერი კლუბი გიწვევს - “ლოტომატიკა”, “ფორტიტუდო” და ბენეტონი”... - აქაური ჟურნალ-გაზეთებისთვის ასეთი რაღცების მოგონება ჩვეულებრივი ამბავია, რათა მკითხველი მიიზიდონ. ამ სამი კლუბიდან ჩემთვის ნაღდად არ მოუმართავს არავის არც ოფიციალურად და არც არაოფიციალურად. “ტერამოსთან” ორწლიანი კონტრაქტი მაკავშირებს, საიდანაც ჯერ მხოლოდ ერთია გასული. აქ თავს მშვენივრად ვგრძნობ და ამჟამად, ისეთი სიტუაციაა, რომ ჯერ არსად წასვლას ვაპირებ. “ტერამოში” პირობებიც ნორმალურია და სათამაშო დროც არ მაკლია - სწორედ ესაა ჩემთვის გადამწყვეტი ფაქტორი. თუმცა, თუკი მექნება შემოთავაზება, ვთქვათ, ევროლიგის კლუბისგან, მაშინ, რაღა თქმა უნდა, დავფიქრდები. მოკლედ, ჯერ სეზონი უნდა დამთავრდეს ევროპაში, სატრანსფერო სეზონი გაიხსსნას და ჩემს მომავალზე მხოლოდ ამის მერე შეიძლება ლაპარაკი. უშუალოდ ტერამოზე, როგორც ქალაქზე რას იტყვი? - პატარა ქალაქია, დაახლოებით, 55000-მდე მაცხოვრებლით, მაგრამ აქ უამრავი ისტორიული ძეგლია, რაც ტურისტებს ანდამატივით იზიდავს. ტერამო რომის იმპერიის დროინდელი ქალაქია და აქედან რომამდე 15 წუთის სავალია. იგივე მანძილია ხმელთაშუა ზღვის სანაპირომდეც. ტერამოს საფეხბურთო კლუბი მეოთხე ლიგაშია. ამიტომაც ქალაქი კალათბურთით ცოცხლობს. ძალიან უყვართ ჩვენი გუნდი და მის თითოეულ წევრს დიდ პატივს სცემენ. დაბოლოს, საქართველოს ეროვნული ნაკრების ახალ თავკაც იგორ კოკოშკოვზე რას იტყვი? - კოკოშკოვთან პირადი ნაცნობობა არ მაკავშირებს, მხოლოდ შორიდან ვიცნობ. მახსოვს, რომ იგი “დეტროიტში” მარკო მილიჩიჩის პირადი მწვრთნელი გახლდათ. ძალიან მინდა, რომ კოკოშკოვი თავის წინამორბედებზე უკეთესი სპეციალისტი იყოს და როგორმე გადაგვიყვანოს ელიტაში. სხვა რა გითხრათ არ ვიცი - აქამდე ყველა მწვრთნელს დიდი იმედებით ვხვდებოდით, მაგრამ ფაქტი ის არის, რომ ზედიზედ მესამე ციკლია, რაც უშედეგოდ ვცდილობთ ელიტაში აღზევებას. რა თქმა უნდა, მწვრთნელზე ბევრი რამაა დამოკიდებული, მაგრამ მხოლოდ მას არ უნდა შევყურებდეთ - ჩვენც უნდა მოვინდომოთ და პასუხისმგებლობა ყველამ თანაბრად გადავინაწილოთ.
Category: ინტერვიუები \| Views: 1266 \| Added by: KICKER \| Rating: 0.0/0 \|